Aare
°

Journal B

Sagt, was Bern bewegt
Aare
°

KOLUMNE /

Renato Kaiser

12.10.2019 | 11:51

Wenn die Durchfallquote zu hoch ist werden Spitäler zur Luxusvariante auf dem Markt der sanitären Anlagen. So zumindest die düstere Zukunftsvision von Korrespondent Renato Kaiser.

Michael Elsener: Immer meh Lüüt göched wäg chline Sache wie Halsweh oder Durchfall nüme zum Husarzt, sondern direkt id Notufnahm. – D'Frog a oise Usse-Korrespondänt, Renato Kaiser, was heisst das genau?

Renato Kaiser: Jo churz zämägfasst. D’Lüt gönd weg jedem Schissdreck in Notfall.

M: Renato, das chöntsch jetzt scho chli aschtändiger säge...

R: Jo schtimmt, tschuldigung. Sägemer’s so: D’Durchfallquotä isch z’hoch.

M: Und wie gönd d'Spitöler denn jetz mit dem Problem um?

R: Jo ganz aifach: Der Notfall ist kein Kotfall, dä Kantonsroot isch sich ainig: Do mues d’Politik ishittä äh ischrittä. Dä Daniel Häuptli vodä Grüeliberalä hät drum vorgschlagä, dass me künftig mues ä Gebüür vo 50 Frankä zalä, wenn me in Notfall will.

M: Aso das heisst, mer döf witerhin mit Durchfall id Notufnaam – mer muess sich’s eifach chönne leischte?

R: Richtig! Das isch jo au s’Partaiprogramm vodä Grüeliberalä: Mir wönd dä menschlichi Komposcht reglä, aber am liebschtä im fraiä Markt. Bösi Zungä behauptet jo, s’ainzig wörkli Grüenä adä Grüeliberalä segi d’Füfzgernotä im Portmonee. Aber: Sie hend jo Recht! Aagebot und Nochfrog! Me hät jo di fraii Waal. Entweder me goot am Baanhof für zwai Schtutz in Mc Clean oder me gönnt sich mol öppis und goot für 50 Frankä in Notfall, wel aim di sanitärä Aalagä besser gfalled. Mee offenä Wettbewerb! D’Notfallstationä hend drum au scho än aigenä Slogan entwickled: «Hatten Sie zu viel Thai Thai? Wir sind ihr Toi Toi!»

M: Aber säg, was isch wemmer en richtige Notfall hed? Muessmer denn au 50 Franke zahle?

R: Jo i nimm aa scho! Das isch denn worschinli di natürlichi Selektion! Ambulantä Darwinismus! Survival of the richest! D’Frog isch doch: Wenn sich öpper än Herzinfarkt finanziell nöd cha laischtä, hät dä überhaupt verdient z’läbä? Dä Daniel Häuptli sait aber au: Wer vomenä Arzt iigwisä wird, mues selbschtverständlich kai Gebüür zalä. Me muesalso entweder immer än Arzt däbi haa, oder äbä 50er Notä.

M: Und wemmer beides ned debi hed?

R: Jo denn dä Organspendeuswis.

M: Nei ärnschthaft, mer hed jo ned immer eifach 50 Stutz debi….

R: Ah sie nemed au Euro, di maischtä Ärzt sind jo Dütschi. Und usserdem wär’s ee besser, wemme kontaktlos zahlt, nur scho us hygienischä Gründ. D’Schpitöler hend für das au scho än Werbeslogan kreiert und zwor: «Wer «Aaaaaaaaah!» sagt, muss auch IBAN sagen.» Und für Schtammgäscht gits ä sonä Schtempfelchartä: Ob Durchfall oder Schlagafall, jedä zäät isch gratis.

M: Oke… Und wie gohts jetz witer?

R: Dä Regierigsrot entschaidet jetzt idä nächschtä drüü Joor, ob er das ä gueti Idee findet oder ä Schissidee.

M: Renato, aso das chönnt mer au chli aschtändiger säge.

R: Ah jo tschuldigung: Äs Gedanke-Exkrement.

M: Oisen Usse-Korreschpondänt, de Renato Kaiser!