Aare
°

Journal B

Sagt, was Bern bewegt
Aare
°
08.05.2015 | 22:12

Am 8. Mai 1945 sy a viunen Ort ir Schwyz Fridenslinde pflanzt worde. Hunderti vo Schüelerinnen u Schüeler sy drby gsi. Für ihrer Hoffnig Usdruck z gä: Nie meh e setige Chrieg!

Sit sibezg Jahr isch’s nümm zumne setige Chrieg cho. U sibezg Jahr ohni Chrieg sy ir Gschicht e längi Zyt. Tatsächlech het’s aber ix Chriege gä, i dene letschte sibezg Jahr, o zmittst in Öiropa. Chriege wi die z Kroazie, z Bosnie, im Kosovo, wo aaschliessend niemer Fridenslinde pflanzt het. Wüu dr Fride numen e Fortsetzig isch gsi vor Chriegslogik, won es Zämeläbe wi das z Bosnie kabutt gmacht het.

O dr 8. Mai 1945 isch nid nume dr Tag vor nazi-dütsche Kapitulazion gsi, sondern dr Uftakt zumne riisige Massaker. Wo Franzose z Algerie ix tuusig Lüt umpracht hei. Wüu die nid nume ds Ändi vom Chrieg hei wöue fyre, sondern o no ds Ändi vom Kolonialismus gforderet hei. Bis hüt het Frankrych das Massaker nid anerkannt.

Trotzdäm bin drfür, Fridenslinde z pflanze, hüt, sibezg Jahr schpeeter. Wüu Öiropa e vrglychswys längi Nidchriegsphase hinger sech het. U däsch vor auem dene wirtschaftlechen u politische Zämeschlüss z vrdanke, won e Fride lukrativer machen aus e Chrieg. Druf hiizwyse, dass sech Schtaaten aus Foug vo däm Chrieg denn hei chönnen uf Mönscherächt einige, Rächt, wo aune Mönsche zuschtö.

Aber näbem Pflanze vo nöie Fridenslinde wär’s vilech no intressant mau z luege, was us dene Linde worden isch, wo vor sibezg Jahr sy pflanzt worde. Linde chöi bis zu tuusig Jahr aut wärde. Wi viu vo dene Linden überhoupt no schtö oder äbe nid schtö, wüu si vomne Blitz sy troffe worde, sy gfäut worden oder vomnen Outo umgfahre.

We me da würd luege, das gäb vilech es zimlech genaus Abbiud drvo, wi guet oder äbe nid guet mir üs um dä Fride kümmere.

(Ein Beitrag von Journal B für Radio RaBE)