Aare
°

Journal B

Sagt, was Bern bewegt
Aare
°

KOLUMNE /

Renato Kaiser

01.03.2019 | 09:50

Im Oktober 2018 liess die saudische Regierung den Journalisten Jama Khashoggi brutal ermorden. Fünf Monate später hat Bundespräsident Ueli Maurer die Sache offenbar schon vergessen. Nicht aber Renato Kaiser.

(Bild: admin.ch; yannic schmezer)

Ganz eerlich: Kenned sie das au? Wenn sie so bi sich dihai inen Ruum inälaufed und wenn sie i dem Ruum inä sind, gar nümä wüssed, was sie aigentlich hend wölä machä? Kain Plan? Und denn sueched sie so ganz verzwiflet nochemä Hiiwis und nocher lueged sie per Zuefall uf iri Hand und gsend denn sonä bluetverschmierti Flaischsägi und denked denn: Ah jo schtimmt! D'Liichä! Diä hani ganz vergessä! Wo isch jetz diä huerä Liichä! Nöd? Guät! Seer guät! Denn sind sie nämli nöd ganz so zerschtreut wiä dä saudischi Prinz Mohammed bin Salman und sini Entourage! Letschti isch nämli idä Zitig gschtandä: «Kashoggi-Leiche nicht gefunden».

Ah das chönd sie sich sicher no erinnerä, dä Regimekritiker und Journalischt, wo in Saudi Arabiä entführt, gfoltered, ermordet und zerstückled wordä isch. Jo diä Gschicht lauft immer no und dä saudischi Usseminischter hät jetz äbä gsait, d'Ermittligä seged grad ganz schwirig, wel sie findet diä Laichä nöd. Und do chönd me jetz jo denkä, chum jetz, sonä Laichä verschwindet doch nöd aifach so. I main zum ä Laichä verschwindä loo müesste me sie jo zerscht i mega chlini Stückli... Ah jo.

Aber äbä jo, Lüt sind vergesslich. Zum Bischpil au üsn Bundespräsident dä Ueli Muurer. Und dä isch mega guet im vergesslich sii, er isch Politiker, er macht das jo sozsägä hauptbrueflich. Er hät gsait, er hegi die Aaglegehait scho lang abghacked ääh abghoogget! Wel wegä dem ainä Fall chöni me Saudi-Arabie doch nöd für Joorä diskriminierä. Das hätter wörkli gsait! Und das macht jo au Sinn. Wel wenn sich öpper defür isetzt, dass Araber nöd diskriminiert werded, denn dä Ueli Muurer! Wiä oft scho hät er gsait: Nur wel ain Araber mol än Feeler gmacht hät, sind nöd ali Araber schlecht! Da isch jetz nöd dä Untergang vom Obigland! Kain Muslim ist illegal! Wer ohne Sünde ist, der werfe die erste Fleischsäge!

Dä Ueli Muurer glaubt nämli scho ad Menscherecht! Also nur bi denä Mensche, wonem recht sind. Weniger Amnesty International. Mee Amnesie International. I freu mi au scho uf sini Autobiografie: Ueli der Knecht - ein Bin SalManifest I glaub, das wird äm Bestseller. Sin ganz persönlichä Petit Prince...

Aber luäg: Sither wüssemer wenigschtens, wenn idä Augä vo üsem Bundespräsident dä Mord amenä Journalischt offiziell verjöört isch, nämlich noch 5 Mönet.

Drum hät er au gsait, irgendwenn mües me wider zum Courant normal übergoo.
Und Courant normal haisst jo übersetzt «Tagesgschäft». I dem Fall mit Betonig uf «Gschäft». Und diä Gschäft sind für d'Schwiz natürlich lukrativ, aber haikel. Also jetz nöd nur, wel d'Saudis Menscherecht verletzed, dä Bürgerchrieg im Jemen unterschützed und Journalischtä zerschtückled, das isch jo Courant normal. Nai s'Problem isch lut emä Expertä tatsächlich: Me chöni, zum Bischpil als Schwizer Bank, fascht nöd sägä, wiä diä Kundä usm Königshuus zu irem Geld cho segäd. Das Erdölgeld chämi über äs dichts Gflecht vo unzäligä undurchsichtigä Zaligä id Königsfamiliä - d'Gfoor, i Korruptionsfäll z'grootä segi seer gross. Oder anderscht gsait: Wenn dä Ueli Muurer so witermacht hät d'Schwiz bald ä Laichä im Cheller, wo so zerstückled und vertailt isch, dass sie früener oder schpöter fascht mues usecho...

 


Dieser Text stammt aus der Sonntags-Satire-Show «Kaiser-Schmarren», die monatlich im im Casinotheater Winterthur stattfindet.