Aare
°

Journal B

Sagt, was Bern bewegt
Aare
°

KOLUMNE /

Renato Kaiser

20.12.2018 | 14:22

Hach, isch das schö, bald Wienachtä, d’Adventszit, sone schöni, besinnlich Zit für d’Familiä, für d’Chind - Kita-Chind sind dumm!

Renato Kaiser über den IQ von Kita-Kindern (Foto: Johanna Bossart)

Jo, dä Toni Bortoluzzi isch chli unbesinnlich druff, mengi sägäd fascht so besinnigslos, wo’s ghört hend, was er do sinngemäss sait. Also gläsä hendses aigentlich. Sis Zitat idä Schlagzilä hätt ghaisse: «Kita-Kinder haben einen tieferen IQ.» Und i ha so denkt, au nai, hoffentlich gsend das diä armi Kita-Chind nöd! Und denn gmerkt, ah nai, diä chönd jo ee nöd läsä, diä sind so dumm!

Nai, i main, i verschtoo dä Ufruer nöd. Äs schtimmt doch. Kita-Chind hend än tüüferä IQ… als Erwachsni, zum Bischpil. I bi sicher gschider als diä, endlich saits mol öppert!

Jetz gits jo Lüt, wo jetzt spasseshalber sägäd, dä Jesus Chrischtus segi jo au äs Chrippechind und dä wöll er doch wool nöd dumm nennä.

Däbi isch diä Chrippä gar kai Kita gsi: Und das isch vilicht genau s’Problem! Jo lueg dir das mol aa:

D’Mueter Maria mit dem Chind, dä Vater isch scho lang nümä umä, isch abghauä, hät gsait er wöli sich selbschtverwürklichä, wel er maint er segi än Gott oder so, the sky is the limit, hät er gsait.

Und dä Schtiifvater Josef isch mega liäb und wör niä öppis Schlechts über dä richtig Vater sägä, wel er waiss, i därä Konschtellation wär das so chli wiä… Blasphemie.

Sin Schtiifsoon dä Jesus hät drum au gar kai Reschpekt vor sim Schtiifvater, hät drum au immer mega Müe zum Verantwortig übernee, will nöd erwachsä werdä, drum hängt er au schtändig nur mit Jüngere umä…

Kai Wunder hät er än Autoritätsproblem, verbraitet sini Mainig überall, vo Pontius bis Pilatus und chum naglet mer en mol druf fescht, isch er belaidigt, verchrücht sich drü Täg i sinerä Hööli, chunt wider fürä, sait no churz zu sinä Ahänger: «Du seged denn alnä än Gruess, gell, i chumä bald wider» und nocher goot er zu sim richtigä Vater und mer hät niä me wieder gsee.

I main, i ha jo nöd vil Aanig vo Chind, vo Kita und vo Kita-Chind. Aber wemmer dozmol scho Kitas gha hetted, hettemer jetz vilicht immer no dä Jesus Chrischtus…

Guet, für dä Toni Bortoluzzi isch dä Jesus Chrischtus worschinli ee nöd sone guets Argument. Also für dä Toni Bortoluzzi. Dass dä Jesus Chrischtus schtändig mit zwölf jungä Manä umenandghanged isch, macht doch ainä wi dä Toni Bortoluzzi skeptisch.  Schliesslich hät er jo au vor ä paar Joor mol gsait: Homosexuelli seged Feelglaiteti mit unnatürlichem Verhaltä, wel si en Hirnlappä heged, wo falsch ume verlaufi.

Und schpöteschtens sit doo wüssemer: Me mues nöd unbedingt inerä Kita ufgwachsä si, zum dumms Züg verzellä.