Aare
°

Journal B

Sagt, was Bern bewegt
Aare
°

KOLUMNE /

Renato Kaiser

23.11.2018 | 17:13

Ich bi so hässig imfall, i ha wölä äs Video tailä miteme Aichhörnli.

 

Äs Video mitämä Aichhörnli, wo so singt, wiä dä Freddie Mercury!

Aber i ha mi dägägä entschidä!

Völlig absurd!

I ha gsait, nai, das chasch jetz nöd tailä, das lenkt nur ab vo all denä guete Artikel gegä d'Selbschtbeschtimmigsinitiative, das isch z'wenig wichtig.

DÄBI GITS DOCH SICHER NÜNT WICHTIGERS ALS Ä VERDAMMTS AICHHÖRNLI WO WIÄ DÄ FREDDIE MERCURY SINGT DAMMI

 

So cha das aifach nöd witergoo, äs isch wider genau gliich wiä dozmol mit dä Durchsetzigsinitiative

Dött hemmer au fascht kai Chatzevideos me gsee, wel üs d'Operation Libero monatelang di ganz Time Line pink iigwichst hät.

(Sorry Operation Libero, isch nöd bös gmaint, bi nur bitz hässig weg dem Aichhörnli)

 

Es cha doch nöd sii, dass ich gfüült all drü Mönet mues drü Mönet lang über irgend ä hinrissigi SVP-Initiative diskutierä, wo wider nünt anders sait als:

«I will, i will i will!»

Waisch, wan ich will?

Ä VERDAMMTS AICHHÖRNLI WO WIÄ DÄ FREDDIE MERCURY SINGT!

 

Und mit Lüt, wo mir denn sägäd «aber d'Menscherecht sind doch scho idä Bundesverfassig drin!»

Jo, du häsch recht, aber nöd ali! Zum Bischpil s'Recht uf aagmessnä Woonruum oder Pflääg

Und usserdem, vor was häsch Angscht? Vor z'vil Menscherecht? Bisch änart nümä ganz bachä?

I waiss, di maischtä vo üs privilegiertä Wumpibumpis verschtönd das nöd, wel's üs so huerä guät goot,

mir chömed jo än hysterische Hüülchrampf über, wemmer nöd i 10min Fuessnöchi äs Elektrotrottinett findet,

Für anderi sind d'Menscherecht s'harte tägliche Broot und für üs halt höchschtens sonän Dessert, womer chönd sägä:

«Au nai Du, Sven, nümä mee vo därä Mango-Aprikosä-Lasagne, süs schimpft denn wider mini Fitnessapp gell hä hä»

Waisch wa! Säg aifach sie sölleds dir iipackä

Nimm diä Bonus-Menscherecht ines Tupperware und nimms mit, wer waiss, vilicht bisch morn jo froo!

 

Und denn diä zwai riisigiä Inserat uf dä 20min-Front!

Und ali hends posted und tailt

ANSCHTATT DAS FREDDIE-MERCURY-AICHHÖRNLI!

Ernschthaft! Wenni will selbschtbewussti Unwoorhaitä und schlechti Zaichnigä aaluegä, denn bsuechi min sechsjöörigä Neffe.

Bi dem sind d'Bluemä immer gliich gross wiä sis Huus und mengmol isch dä Hund pink, hätt Flügel und schifft am Nochber is Chemi

AIFACH WEL ER BOCK DRUFF HÄT

Aber bi dem nimmt das niemert als Rotschlag zum am Suntig abschtimme

Usserd sini chli Schwöschter, aber diä isch au loco, okay?

 

Zwaimol d'SVP uf dä 20min-Front, me chönt mainä, dä Hans Fehr hegi wider ä neui Putzchraft bi sich dihai igschtellt

*schnalzschnalz*

 

Und was lernemer drus? Nünt isch umesüs!

Das hemmer jetz devo, wel me joorelang so tuä hend, als segi Journalismus gratis und 20min ä richtig Zitig.

Und jetz hemmer zurecht Schiss.

Wel wer maint, 20min segi ä richtig Zitig, maint vilicht au das uf denä Inserat seged richtigi Ussagä.

 

Und ganz eerlich: Wenn's d'SVP schafft, mit irem Minarette-Tourette und Word-Paint-Zaichnigä mit Schriftart Comic Sans und dä Grafik-Skillz vomenä Dorfmusigverain s'Schtimmvolk z'überzügä, denn hemmer's au nöd anderscht verdient.

(Ihr sind nöd gmaint, Musigverain Melodia Goldach, Eui Flyer sind immer funkyfresh)

 

Also riissed Eu zämä, zaiged, dass dä grösser Tail vodä Schwiz nöd völlig irre isch

abgsee vo minerä Nichtä, diä isch crazy...

und stimmed nai zu dä Selbschtbeschtimmigsinitiative.

 

Und wenner dä Text verbraited post ich bimenä Nai zudä SBI das das Aichhörnli-Video. Und jo, das isch vilicht chli manipulativ, scho. Aber i ha halt nöd grad 100'000 Schtutz uf dä Sitä zum ä ganzsitigs Inserat uf dä 20min-Front z'chaufä. Und sowiso: Inerä Schwiz, wo s'20min schtärcher isch als äs Aichhörnli mit dä Schtimm vom Freddie Mercury, möcht ich also nöd läbä.