Aare
°

Journal B

Sagt, was Bern bewegt
Aare
°

KOLUMNE /

Renato Kaiser

13.11.2018 | 11:15

Sage ich eher ja zur Menschenrechtskonvention oder nein zur SVP-Kampagne? Das fragt sich Renato Kaiser in seiner Kolumne.

Ein Plakat mit den Farben der CVP und dem Inhalt der SVP.

Bundesverfassig vor Völkerrecht. Womer wieder mol so denkt: «Ha! Haha! Ha... ah wörkli...» Vili hend jo au gar nöd gmerkt, dass diä Kampagne vodä SVP isch. Wel überall hät me nur diä mildä, stylishe Plakat gsee i somenä hell orange, so dass me sich denkt hät: «Hä? Warum hät d'CVP ufzmol klari Botschaftä?» Aber jo, sie isch uf jedä Fall doch vodä SVP und i ha jo ächli s'Gfüül, dä SVP gönd langsam d'Sündeböck uus: Zerscht sind d'Italiener cho, denn diä usm Balkan, denn no diä us Afrika und jetz, was hemmer devo? Genau. Jetz chömed au no Menscherecht, jo bravo.

I waiss no, 2014, wo diä Initiative lanciert wordä isch, hät dä Ueli Muurer gsait d'Schwiz müesi unbedingt d'Menscherechtskonvention kündigä, wel diä segi nümä mit dä Souveränität vodä Schwiz kompatibel. Diä Ussag mues me sich mol uf dä Zunge zergoo loo. Und verschtönd mi nöd falsch: Souveränität isch öppis Wichtigs und Guets. Zum Bischpil dä Roger Federer isch jo seer souverän. Me chönti durchus sägä, Souveränität segi eini vo sinä grossä Schtärchä. Aber schtell Dir mol vor, öpper sait: D'Souveränität vom Roger Federer isch nöd mit dä Menscherechtskonvention kompatibel, do wirsch doch chli skeptisch. Vor allem wenn er denn so im Platzinterview sait: «Jo ich bi souverän in Halbfinal vorgschtossä, aber für das hani müesä dä Stuelschiedsrichter waterboarde, aber jo hauptsach souverän.»

Diä Initiative sait aigentlich: «Was Menscherecht sind und was nöd, das entschaidet denn immer also immer no dä Souverän!» Däbi simmer jo idä Schwiz, was Menscherecht agoot gar nöd immer so souverän gsi. Seer lang simmer schliesslich vor allem än SouverMÄN gsi. Nöd grad bsunders vorbildlich. Häschtäg Fraueschtimmrecht, Häschtäg Appezell Innerinnerinnerrhodä!

Und jo, es gseet so uus, als wärdi diä Abschtimmig recht knapp. Und i cha's jo ächli verschto.
«Säg jo, Du Tubl!»
«Säg nai, Du Tubl!»

Wiä söll me denn do no selbschtbeschtimmt si? Däbi isches aigentlich ganz aifach. Du muesch Dir aifach nur überleggä: Sägi eher nai zu dä Menscherechtskonvention oder sägi eher nai zu därä SVP-Kampagne?

Schtöred mi eher di sogenanntä fremde Richter? Oder di wool bekanntä heimischä Rechte? Und denn unbedingt go abschtimmä. Wel je noch dem wird me süs ufzmol vo irgendwelchnä Selbschtbeschtimmer fremdbeschtimmt.