Aare
°

Journal B

Sagt, was Bern bewegt
Aare
°

KOLUMNE /

Renato Kaiser

27.04.2020 | 08:00

Renato Kaiser sorgt für eine klare Faktenlage: Ja, Joggen ist erlaubt, aber bitte fühlt euch nicht verpflichtet.

 

I waiss, d’Uussagä vom Bund sind mengmol äs bitzli missverständlich, drum möchti i aim wichtigä Punkt jetz mol Klarhait schaffä, nämlich: Jo, Du törfsch go joggä… Aber Du muäsch nöd!

Vor dem Virus chasch nöd devorennä, vor allem nöd im Krais!

Ich schtell mir vor, wiä diä Joggingjunkies dozmol bidä erschtä Pressekonferenz vor d em Fernsee ghocked sind

«Liebe Mitbürgerinnen und Mitbürger, dieses Virus ist gefährlich»

«mhm?»

«…hoch ansteckend…»

«mhm?»

«…könnten sehr viele Leute sterb…»

«mhm?»

«…müssen jetzt viel die Hände waschen, so gut es geht zu Hause bleiben und Abstand voneinander hal…»

«mmh, jo okay, aber wiä ischs mit Joggä?»

«ehm entschuldigen Sie?»

«joggä, wiä isch’s mit joggä!

«aha, also gut, ich weiss nicht, ob das jetzt unsere grösste…»

«OBI TÖRF…, obi törf go jogge, das isch aläs.»

«Gut, also wenn Sie ganz alleine sind und niemandem zu nahe kommen, ja, dann können Sie natürlich auch»

«GAIL! JOGGÄ! SCHATZ! LÜT DÄ FAMILIÄ AA, DÄ FRÜNDÄ UND AM GSCHÄFT JETZT GÖMMER ALI ZÄMÄ GO JOGGÄ! GÄGÄ DAS CORONA VIRUS!»

«WAS? JOGGÄ TÖTET DÄ VIRUS?»

«JO HÄT DÄ BUND GSAIT!»

«JO DENN MÜEMER JETZ USÄ DIÄ LÜT GO RETTÄ!»

Also so chunts mir zumindescht vor!

So nöch wiä diä amel a mir vorbischpaichled, hani s’Gfüül, diä wöled mir jetzdenn grad ä Mund-zu-Mund-Beatmig gee

Du törfsch go joggä, aber weg dem muäsch du mir bim Schpaziergang nöd in Hals inäschnuufä wienen Vampir churz vor dä Füeterig

und jo i waiss, joggä schtärcht s’Immunsyschtem

aber nur Dis!

Maschturbierä schtärcht au s’Immunsyschtem!

Aber weg dem muesch jo jetz au nöd grad i Drüergruppenä im Wald haarscharf a andernä vorbiimaschturbierä!

Das chasch denn noch Corona wider machä!

machs nöd

Und luäg, i verschtoos jo, i bi früener au gern go jogge, aber denn… hani Fründä gfundä!

Nai ernschthaft, es goot jo drum, dass me so alai wiä möglich goot go joggä

Und da isch doch au immer scho s’Schöne dra gsi!

Me gseet hundsmiserabel uus, aber niemert gseets!

Und wenn öpper entgegä chunt, zücht me churz s’Tempo aa

dä Buuch ii

d’Mundwinkel ufä und sait

«Guetä Morgä»

hebed d’Luft aa und und bricht hinderem nächschtä Eggä in Würde zämä.

Und klar törfeder als Familiä zämä go joggä, wenn’s umbedingt muäs sii

aber tüend nöd so, als wöred Eui Chind das fraiwillig machä.

Chum scho

Denä hender doch gsait, Ihr gänged in Europapark und jetz renneds Eu nur noo, wel’s alai nümä hai findet!

Oder wel sie sich Sorgä mached um iräs jüngschte Gschwüschterti, wo vornä im Offroader-Chinderwagä vor luter Rüttlä fascht am aigenä Erbrochnä erschtickt.

«Siitelaag, Liam, Siitelag!»

I waiss, am Afang vo därä Krisä hender no gmaint, da segi no ä gueti Idee, aifach mol so chli go rennä

Erschtä Taag vier Kilometer, jo bravo!

zwaitä Taag, sechs Kilometer, hey super!

und am drittä Taag liggeder direkt nochm Schtart miterä Seeneschaideentzügig im Gartä vom Nochber,

woner ganz langsam wöred verendä, wenn dä Eu nöd ab und zuä wör d’Reschtä vo sim selbergmachtä Suurtaigbrot usm Fenschter rüerä.

Drum aläs i aläm: Gönd go joggä, aber denked dra:

Ihr schnufed mee, Ihr schwitzed mee und

simmer eerlich

Ihr brüeled mee.

Stichwort Tröpfli-Infektion.

Und i will jo sowieso lieber nöd aagschteckt werdä. 

Aber wenn, denn sicher nöd vodä Tränä vomenä Jogger.