Nai ächt, also a därä Schtell möchti jetz aifach mol äs Kompliment ussprechä, a all diä wo so vorbildlich läbäd jetzä grad, also ich muäs ganz eerlich sägä: Ich hass Eu!

HEY DU STREBER 

Eues selbergmachte Brot gseet vil z’guet us.

Ernschthaft.

Das törf nöd so guät usgsee!

Ihr mached mir aläs kabutt!

Nünt macht mit weniger Ufwand mee Iidruck, als ä schlecht gmachts selbergmachts Brot.

Anderi chömed zunerä Party mit irenä Herdöpfelsalöt oder Taigwaräsalöt oder irenä schissigä Tiramisu

und denn chum ich

mit

em

ä

sel-ber-gmach-tä Brot

Heerrrrrrlich!

«Au nai, Renato, das Brot isch das...?»

«Jo. Selbergmacht.»

 

Ä rhetorischi Frog, wel jo me gseets!

wiiss, grüüsig, gummigi Rindä

Ä richtigs selbergmachts Brot gseet uus wienä Madä

und schmeckt au chli so

selbergmachts Brot wo nöd usgseet wiä selbergmachts Brot, isch das überhaupt no ä selbergmachts Brot?

Nai isches nöd Du Schtreber!

Jo und natürli bini niidisch uf Eu, wel Ihr di ganzi Situation so uhuerä guät im Griff hend

I gsee’s di ganz Zit uf Facebook, uf Instagram

Und ufm Balkon! Dött gseenis au

Wenn Ihr so souverän klatsched für’s Pflegepersonal

I bi sogar vo dem überforderet!

Also fangts jetz aa?

Gell am ais hends gsait?

Isches überhaupt hüt?

Ha ee kai Aanig mee, welä Tag das isch.

Und denn fangt mini Fründin näbäd mir aifach aa klatschä,

genau zum richtigä Zitpunkt

aber das wunderet mi au gar nöd, diä macht jo zurzit au grad selber Saifä

 

Aber, guät wenigschtens gseet diä au uus wiä selbergmachti Saifä

Wiiss und taigig.

«Gseet ächli us wienen Usschlag, wonen Usschlag übercho hätt»

hani gsait

«oder halt wiä mis Broot»

und DAS hätt sie denn wörkli belaidiget

vor äs paar Täg hät sie drum zu mir gsait, äs Kafisatz-Peeling segi guät für d’Huut

«aifach unter d’Duschi und chräftig iiriibä das Zügs»

und i ha das natürli glaubt

und sither schmeck ich noch abgschtandnem Kafi, mini Fründin findets mega luschtig und jedes Mol, wenn mini Bialetti brodlet, rüeft sie

«Hey Schatz, Din Kafi lacht Di wider us!»

Guät denn simmer also ali so am klatschä und ali gsend huerä souverän us und mached au sonä guäts, solidarischs Gsicht und ich gsee nur äso uus:

 

Jo i main, diä idä Schpitöler riskiered iri Gsundhait, retted Läbä und was mach ich, schtoo am Fenschter, klatsch id Hend und ha nöd emol ä Hosä a.

I main, warum au!

Verurtail mi nöd!

Du i ha gar nöd uf d’Uur gluägt, isch diä Minutä langsam verbi, hät öpperd än Wecker gschtellt?

Wötsch jo au nöd dä erscht sii, wo ufhört mit klatschä.

was sölled denn d’Lüt denkä!

Diä merked sich das, wenn’s denn hart uf hart chunt:

«Au nai, mir hend nur no ai Beatmigsgrät, gäbemers jetzt am Renato oder dä Tanja?»

«Also d’Tanja schpilt jedä Tag 4 Schtund Klarinette, sit sie nümä id Schuel mues»

«Vorbildlich»

«Aber au chli nervig»

«Aber waisch no, wo dozmol dä Renato noch 55 Sekundä ufghört hät klatschä!»

«Richtig und i glaub, dä hät nöd mol Hosä aaghaa, dä Grüsl»

«Voll schiss uf dä!»

Nöd so wiä d’Frau Wyttebach vo gegenüber

Wo no 10 Sekundä länger klatsched hät als ali anderä

«Du Sau wötsch doch nur äs Beatmigsgrät!»

Jo sorry

I waiss

I bi nur niidisch uf all diä, wo so vorbildlich sind

Wiä äbä zum Bischpil mini Fründin

Sie hät letschti grad gsait, sie gängi ab jetz für üs go poschtä

es seg weniger schlimm, wenn SIE chrank werdi

ich mües jo schliesslich do diä Videos machä

Mega lieb vo ihrä!

Sit doo lebt sie vorem Huus im Gartä.

Jo diä looni sicher nümä inä, schpinnsch, diä isch jo völlig verschtraalt.

Aber i bi kain Unmensch, mengmol schtooni as Fenschter und klatsch für sie.

 

Lang goot das aber nümä

worschinli mueni sie scho bald wider inäloo…

Ha kai Saifä me.