Aare
°

Journal B

Sagt, was Bern bewegt
Aare
°

KOLUMNE /

Renato Kaiser

30.03.2020 | 14:53

Das Verschwörungstheoretiker-Bullshitbingo hat in Coronazeiten Hochkonjunktur. Renato Kaiser gibt Tipps für den Umgang mit selbsterklärten Welterklärern.

 

Was?

Du häsch uf YouTube gsee, dass das Corona-Virus aigentli nöd vil mee segi als ä Gripp und di ganzi Panik völlig übertribä und drum häsch jetz das Video uf minerä Facebooksitä tailt…?

Waisch wa!? Du häsch Recht.

ICH VERSCHWÖR!

D’Frog isch jo: Warum chrüched genau jetzt zu därä Zit so vil Verschwörigstheoretiker us irenä Löcher?

Ganz aifach: Wel d’Flugis nümä törfed flügä, sind au vil weniger Chemtrails idä Luft.

Und jetzt wached alli uuf!

Ernschthaft, mir müend mol churz über all diä komischä Verschwörigstheoretiker-Videos redä und wenn Du jetz findsch:

Du saisch «Verschwörigstheoretiker», nur wel’d kai anderi Mainig ushaltisch denn bisch DU höchschtworschinli ainä, wo sötigi Videos tailt.

Klar isch nöd jedä miterä anderä Mainig än Verschwörigstheoretiker

Du häsch Recht, me sött nöd ali i ain Topf wörfä, schliesslich gitts jo nöd nur schwarz und weiss, sondern au… Schaiss.

Und genau das sind di maischtä Videos, wo mir idä letschtä Zit i mini Timeline inägaiferet werded.

Und Du häsch Recht, äs törfed ali postä, was sie wönd, aber bi aller Freud adä Mainigsfraihait:

Wer’s imenä Video schafft, innerhalb vom 90 Sekundä vom Corona-Virus über Mainstream-Mediä und Mainigsdiktatur zum Holocaust z’cho, liit bim Verschwörigstheoretiker-Bullshitbingo aifach scho recht wiit vornä.

Witerä Tipp:

Wenn’s Video nochm erschtä Holocaust-Vergliich gliich nomol 30 Minutä lang witergoot, denn isches ganz sicher än Verschwörigstheoretiker.

Früener isch’s halt au aifacher gsi diä z’erkennä.

Und zwor do dra, dass sie sich alai dihai im Cheller vodä Elterä voreme Bücherregal gfilmet hend

wenn’s nöd grad inä dütschi Talkshow igladä wordä sind

oder id Arena

*zwinker*

aber jetzt wärend dä Coronakrise mached das jo wegm Home-Office alli soo!

Jetz grad gseet jo au jedä Bestseller-Autor, wo grad uf Instagram ä Live-Lesig macht, vodä Ästhetik her uus, als ob er Dir will  än halbä Liter abgfüllti bolivischi Bergluft verchaufä, als Gegemittel für diä Chemtrails!

Aber luäg: Du häsch Recht, s’Internet isch super.

Es gitt Dir grenzelosi Möglichkaitä, Dich z’informierä,  das Wüssä denn z’kanalisierä und z’interpetierä aber vilicht chasch Du das gar nöd so guät.

Wer waiss!

Vilicht chönds anderi besser, zum Bischpil Journalischtinnä und Journalischtä, diä hend tailwiis sogar än Usbildig!

Das haisst, wenn all diä Schöfli dött ussä uf öpperd anderscht losed, als uf Di, denn sind diä Schöfli eventuell gar nöd dumm, sondern vilicht bisch Du aifach nöd sonen guetä Hirt.

Oder dä Typ vo dem YouTube-Video, wo Du tailt häsch.

Aber Du häsch Recht.

Du häsch s’Recht söttigi Videos z’tailä.

Und irgend ä allainerziehendi Mueter, wo bim Homeschooling grad än halbä Nervezämäbruch hätt und sich glichzitig Sorgä um iri Grossmueter macht, hät s’Recht, Dir z’sägä, dass sie kain Bock uf Din Schaiss hät!

Und än komplett isoliertä, immungschwächtä Risikopatient hät s’Recht, Dich z’frogä, ob Du aigentli nöd ganz bachä bisch und ich ha’s Recht Dir z’sägä:

Hey: Din Experte uf YouTube überzügt mi nöd so richtig.

«Aha? Dä Typ isch ehemoligä Bänker und jetzä Life-Coach und er verglicht sich mitem Leonardo Da Vinci? schpannend!
Mol luegä, was dä zu dä gröschtä globalä Krisä, woni i mim Läbä je gsee ha, so sait!»

Nai!

Do chaner uf sinerä Homepage no so verträumt über äs Wulchemeer luegä und äs Rilke-Zitat in Himmel huuchä!

Drum jetz no än Tipp für ali anderä:

Wenn öpper Eu sonen Verschwörigstheoretiker uf Eui Pinnwand postet.

Denn schribed ihm inerä Privatnochricht:

Du häsch Recht.

Müend luegä, wiä baff, dä isch.

Dä isch sich das gar nöd gwöönt!

Und denn lösched sin Link.

Und wenn er frogt:

«Aber warum?»

sägeder:

«D’Lüt sind aifach no nöd berait für d’Woorhait…»