Aare
°

Journal B

Sagt, was Bern bewegt
Aare
°

KOLUMNE /

Renato Kaiser

23.03.2020 | 08:00

Renato Kaiser sinniert über Altersheim-Gangs, Kommunikationsschwierigkeiten und die schönen, befreienden Seiten des momentanen Lebens.

 

Di ganz Sach hät au sini positivä Siitä. Äs isch zum Bischpil no niä so aifach und okay gsi, s’Fenschter ufztuä, und us dä Woonig usezschraiä:

«Hey Altä! Gang hai!»

Nai, zudä jetzigä Zit isch das sogar gsellschaftlich anerkannt.
So wiit simmer also cho: Uf Aaordnig vom Bundesrot Seniorinnä zämäschissä.
Me mues jo schliesslich losä, was d’Regierig sait!

Und uf ali anderä, wo guäti Ideeä hend!
was jo super isch, aber do gits mengmol natürli au Konflikt.

Zum Bischpil schtell Dir vor Du bisch grad so am applaudierä für’s Pflegepersonal, di ganz Schtross isch am klatschä und am joolä
(flüsternd) und wird sich idä nägschtä Abschtimmig beschtimmt iisetzä, wenn wider mol äs Schpitol söll privatisiert werdä
*zwinkerzwinker*

also ali so am klatschä und denn lauft ufzmol seeleruhig sonä alti Frau uf dä Schtross vorbi so:
*winken*

und ali höred sofort uf klatschä und rüefed:
«Nai! Da isch nöd für Sie, Frau Hungerbüeler! Nä-ä! Und jetz hopp zrugg is Chörbli» *klatsch*klatsch*klatsch*»

Und vilicht hät das d’Frau Hungerbüeler jo sogar wörkli extra gmacht.
No niä isches aifacher gsi, Applaus überzcho.

I main au für mi als Komiker isch ganz schwierig gsi, das chunt aifach ganz automatisch, ali so am klatschä und ich:
«Jo. Nai. Also wörkli, nai merci. Höred Sie doch uuf, i ha doch no gaar nöd aagfangä: Wir haben doch keine Zeit!»

Und wenn Du jetzt diä Stefan-Raab-Referenz verschtandä häsch, denn bisch Du ganz offiziell alt und törfsch nümä usm Huus!
Und jo klar, äs isch zurzit wichtiger denn jee, dass me dä Humor nöd verlüürt.

Und jo, irgendwiä isch’s jo scho luschtig, zum Bischpil diä Vorschtellig, dass zurzit dussä so Hordä vo Rentnerinnä und Rentner umeschtrieled, sich i so Gangs zämärotted und halt so huerä kriminell am… umeschpaziere sind.

Und im drittä Schtock rissed irgendwelchi wohlstandverwaarlosti mittevierzgjöörigi Investment Banker im Home Office d’Fenschter uuf und rüefed abä:

«Hey Altä! Gang hai!»

Und d’Rentnerin rüeft ufä:
«Dini Mueter!»

Und er so:
«Aber Du bisch mini Mueter!»

Nai, das passiert natürlich nöd, schliesslich simmer jo ali höflich, drum rüeft er obenabä:
«Chum jetz, Mami, tuä mir dä Gfallä und gang hai!»

Und sie so:
«Was? Zu Dir hai? Okay! I bi inerä Halbschtund dobä!»

«Nooooooooiii!»

Und er schrait abä:
«Mach das nöd, Mami! I chönt Di tötä!»

Au än Satz, womer süs niä so zu sinä Elterä gsait hät.

Denkt vilicht.

Aber nöd gsait.

Und au uf dä Schtrooss, diä Vorschtellig, diä Kommunikationsproblem!

Du schraisch di Altä us sicherem Abschtand aa, sie söled dihai blibä

Und sie ghööred Di nöd so guät und chömed drum no nöcher

Äs Dilemma!

Und sie chömed immer nöcher uf Di zuä
so chli wi seer langsami seer fründlichi Selbschtmordattentäter

Allahu Nachbar!

Und Du wiichsch immer witer zrugg und sie folged Dir, schlussendlich bis hai, supercreepy!

Zombies mit drittä Zää

Untoti mit Rollator

Walking Dead

Walking Granddad

Ganz eerlich: Wiä bringt me diä hai!

Wemme di ganz Ziit mues Abschtand haltä und sie nöd törf aalangä, muemer denn um sie umerennä, wiä Herdehünd

Chunt vo dött vilicht dä Begriff… Herdeimmunität…?

Und di Altä sägäd:

Immunität? I MUN GAR NÜNT!

Und laufed seeleruhig witer und wenn öpper si will aschprechä sägäds äbä nur:

Was häsch gsait? Hä?

Wiemer’s inerä Gang halt so macht

Was häsch gsait? Hä?

Und natürlich isches es Vorurtail, dass alti Lüüt nöd guät ghööred.

Da schtimmt gar nöd.

Sie losed aifach nümä so guät.

Und schwer vo Begriff sind jo au anderi, äs goot jo nöd nur di Altä aa, sondern au di Jungä.

Guät, diä ghöred au nöd vil, wel sie schtändig so Chopfhörer im Oor hend, wo usgsend, als heged sie sich äs überdimensionierts Spermium is Oor ghenkt.

Di aintä hend z’wenig Hörgrät, di anderä z’vil, do schlüsst sich dä Krais.

Langer Rede kurzer Sinn:

Es wär alles seer luschtig, wenn’s nöd so ernscht wär. Drum sind vernünftig, lueged ufenand, losed ufenand.

Am beschtä idä aigenä vier Wänd.

Bliib dihai.