Aare
°

Journal B

Sagt, was Bern bewegt
Aare
°

KOLUMNE /

Renato Kaiser

05.11.2019 | 15:37

Aussenkorrespondent Renato Kaiser sinniert über die Altherren und zeigt, dass reaktionäre Sprüche keine Frage des Jahrgangs sind.

 

Michael Elsener: D‘Männerwelt schtoot idä letschtä Joor mee idä Kritik denn je. Grad dä Begriff „wissi, alti Manä“ isch zumenä Schlagwort für rückschtändigi Type wordä. Aber: Hüt isch Weltmanätag! Ich frag drum üsen Ussekorreschpondent Renato Kaiser, haisst das, d‘Männerwelt cha für ain Taag düreschnufä? Wiä isch d‘Schtimmig?

Renato Kaiser: Jooo! Also aigentli nöd wörkli. Das hüt isch äbä au gar nöd dä Weltmanätag, sondern nur dä „Aktionstag für Männergesundheit“ und dä wiist druff hii, dass d‘Lebeserwartig bi Manä im Schnitt 7 Joor chürzer isch als bidä Frauä.

M: Das heisst, hüt werded di altä, wissä Manä aigentli nur dra erinneret, dass sie früener schterbed? Renato... i ha gmaint, Du hegsch guäti Nochrichtä für sie?

R: Jo! Und zwor do us Thüringen! D‘AfD hät do bidä Landtagswaalä zwar quer durch alli Altersgruppä gwunnä - usserd bi denä über 60i! Di altä wissä Manä sind für aimol nöd tschuld! Di Jungä hend di Rächtä gwäält!

M: Und wiä erklärsch Du Dir das?

R: Woorschinli mangelndi Gschichtsbildig vo dä Jungä. Di chönd hützutags jo tailwiis nöd emol me Faschismus vo Fasching unterschaidä - wo bi d‘Grenzä dött natürli au flüssend sind.

M: Du wörsch also sägä, di Altä wüssed gwüssi Sachä vilicht doch besser?

R: Jo sicher! Grad i dem Fall! I main: Öpper, wo vor 70 Joor uf‘d Welt cho isch, kennt sonä Partai wiä d‘AfD sozsägä scho us sinerä Jugend.

M: Du wörsch also sägä, alti, wissi Manä findet d’AfD gar nöd so guät?

R: Jo also nöd ali, klar. Ain beschtimmtä scho. In Insiderkrise schtoot d’Abchürzig „AfD“ schliesslich für „Adolf fänd’s dufte“.

M: Uff, also i waiss nöd, me mues jo nöd grad mit dä Naziküülä cho...

R: Aber das isch äbä genau dä Punkt: Me törf äbä jo nöd verallgemainerä: Nöd jedä wissi, alti Maa isch än Nazi. Und nöd jedä untalentierti Mooler, wo menschefaindlichi Parolä verbraitet, isch grad dä Adolf Hitler. Mengmol isches aifach nur dä Rolf Knie. Und me törf au nöd aifach sägä, dä Björn Höcke segi än altä Faschischt. Schliesslich ischer nöd… so alt. 47i. Aber Faschischt törf me en nennä, das hät äs dütsches Verwaltigsricht entschidä.

M: Du aber: Wiä hend aigentli d‘Frauä z‘Thüringen gwäält?

R: Im Gegesatz zu dä Manä hend d’Frauä vor allem links gwäält.

M: Das heisst also schlussendlich, Manä wäled rechts und schterbed früener und Frauä wäled links und müend defür länger demit läbä?

R: Richtig. Wobi, das mues nünt haissä, vili Frauä hend jo bekanntlich ä Linksrechtsschwächi HÄHÄHÄ gseesch, Michi, das maini! Für so reaktionäri Altherräwitz bruchts nöd unbedingt alti, wissi Manä, das chönd au Jüngeri machä, so wi Du und i, egal ob mit Nazi-Glatzä oder miterä Frisur wienän arischä Flokatiteppich. Und solang das so isch, isch jedä Tag Weltmanätag.

M: Üsen Ussekorreschondent, live and still alive, us Thüringen, dä Renato Kaiser!