Aare
°

Journal B

Sagt, was Bern bewegt
Aare
°

KOLUMNE /

Renato Kaiser

26.09.2019 | 12:30

Grosse Aufregung um das Schwarze Loch im Zentrum unserer Milchstrasse: Wieso leuchtet es plötzlich so hell? Aussenkorrespondent Renato Kaiser will Licht ins Dunkel bringen.

Michael Elsener: Amerikanischi Sterneforscher schtönd voreme Rätsel: Im Zentrum vodä Milchschtrooss schtraalt äs schwarzes Loch so hell wiä no niä. Mir schalted drum zu üsm Ussekorreschpondent am Renato Kaiser live… usm Weltall?

Renato Kaiser (hässig): Jo! Usm Weltall! Tuä nöd so überrascht!

Michi: Was aber wiso?

Renato: Jo das isch doch Dini Idee gsi!

Michi: Was mini Idee…

Renato: Jo noch letschtä Sitzig, womer über das Thema do gredt hend, häsch Du gsait: Super, jetz machemer Firobig, tschüss Renato, ab is schwarze Loch!

Michi: Jo. Aber mit dem hani gmaint id Oschtschwiz… Du chunsch doch us dä Ostschwiz?

Renato: (flüsternd) Pschschscht! Das mues jetz au nöd jedä wüssä. (Laut in die Kamera) I BI ÄN BERNO! BERNO!

Michi: Jo guät, aber Renato, wennd grad scho döttä bisch, wiä gseet’s us?

Renato: Jo moll. Jetz woni do bi, mueni sägä: Scho schö. Und diä Milchschtrooss mit all sinä Schternä sind si chli… wiä Dini Augä…

Michi: Aww, da isch aber liäb, merci.

Renato: Jo. Wi Dini Augä. Vo Wiitem gseets super us und funkled, aber wennd gnauer aneluegsch, isch dehinder aifach nur ä schwarzes Loch HAHAHA! Ganz ruuhig Michi: Ä schwarzes Loch hät d’Massä vo 4 Millionä Sunnä. So wi Du. Drum schtraalsch Du au immer so wienen frischgschlupftä Pudelwelpä uf MDMA.

Michi: Jo okay, es goot jetz aber nöd um mii, sondern um diä Forscher z’Los Angeles…

Renato: Ä-hä! Jo! Diä Forscher hend 24 Joor lang ä schwarzes Loch aagschtarrt und jetz usegfundä: Äs lüchted! Jo bravo! Das haisst entweder isch das ä baanbrechendi Entdeckig idä Aschtrophysik oder me merkt aifach, dass z’Kaliforniä Marihuana sitemä Joor legal isch.

Michi: Jo aber. Wenn ä schwarzes Loch starch lüchted, haisst das nöd, dass es seer aktiv isch, also gfrässig, anderscht gfröged, isch das nöd ächli gföörlich?

Renato: Gföörlich? Ehm, Du nai, also bis jetzt gschpüri also nünt devo, dass uuhh uuäuääuää uuhhh *schlupp*

Michi: Renato? Renato…?

Renato: Fuck.

Michi: Renato? Wo bisch? Was isch los?

Renato: Was los isch? Kai Aanig. I letschter Zit isch’s aläs ächli schwirig. Privat aber au brueflich, seer vil Druck, ha kain Bodä me unter dä Füess, i chum fascht kai Luft me über, waiss au nöd, mengmol hani s’Gfüül I SEGI IMENÄ RIISIGÄ SCHWARZÄ LOCH MICHI!

Michi: Jo okay, i ha verschtandä. Aber chasch üs vilicht sägä… wiä’s dött usgseet? 

Renato: Recht dunkel! Michi! *Pause* wart. Moment. Mega vil ainzelni Söckä. Und was isch das dött hinä? Än Zirkuswagä, wo druff schtoot… Beat Breu… und än Koffer voller Geld, und druff schtoot… Serafe… Ouh und wart… dött hinä… Yes Michi! I chumä bald zrugg, dött hinä isch… än Helikopter! ÄN HELIKOPTER HAAAAHAHAHA-

Michi: Usm schwarze Loch, üsen Ussekorreschpondent, dä Renato Kaiser!

 

 


Dieser Beitrag erschien in der SRF Sendung «Late Update». Auf Journal B gibt es die Auftritte von Renato Kaiser regelmässig zum Nachlesen in Schriftform.