Aare
°

Journal B

Sagt, was Bern bewegt
Aare
°

KOLUMNE /

Renato Kaiser

22.03.2019 | 10:47

Im Parlament wird diskutiert, die Kinderrenten zu kürzen. Oder zumindest umzubenennen. Renato Kaiser hätte da aber einen ganz anderen Vorschlag.


Michael Elsener: Idä letschtä Wuchä isch d’IV-Revision äs grosses Thema gsi - es mues gschparet werdä. Därä Mainig isch zumindescht d’Mehrhait vom Nationalrat. Er hät sich jetz defür uusgschprochä, d’Chinderrentä z’chürzä. Oisen Ussekorreschpondent, Renato Kaiser, was isch genau passiert.

Renato Kaiser: Jo zerscht hät’s grossi Ufruur gee. Wo diä s’erscht Mol mit dem Vorschlag cho sind, sie wöled Chinderrentä chürzä, hend zerscht ali Chinder-Entä verschtandä und gsait: Waas? Ihr wönd Chinder-Entä chürzä? Das isch doch gemain! Chinder-Entä sind doch scho churz gnueg! Und denn hend di anderä gsait: «Nai, nöd Chinder-Entä, Chinder-Rentä, Rentä vo Chinder wömmer chürzä!» und denn ali so «aahh, Ihr wönd nur Chind Geld wegnee, ah denn isch jo nöd so schlimm.»

M: Also was? Dä Chind s’Geld wegnee isch nöd so schlimm?

R: Jo moll, anschinend scho, hends denn gmerkt, Chind schined für vili Lüt ä Herzensaaglegehait z’si, und drum hends au reagiert.

M: Das haisst, sie hend d‘Chinderrente wider erhöht?

R: Nahahahaaaiii, umtauft! Dä Begriff segi aifach vil z‘fescht emotional ufgladä. Künftig wird d‘Chinderrente nümä Chinderrente haissä, sondern «Zulage für Eltern». Zum sachlich blibä. Wel jo iiiirgendwo müesmer jo mit schparä aafangä und es chöni halt aifach nöd sii, dass ufzmol Familiä mit IV-Rentä besser doo schtäched als Familiä, wo iren Unterhalt selber verdiened.

M: Jo guät, aber denn chönt me jo au luegä, dass d’Normalverdiener aifach mee verdiened?

R: Nai, Michi, es isch jo nöd s’Ziil, dasses dä Normalverdiener so guät goot wiä dä IV-Bezüger, sondern dasses dä IV-Bezüger so schlecht goot wiä dä Normalverdiener...

M: Also das haisst, dä Lüt mit IV-Rentä goots hüt z’guät?

R: Jo anschinend! Vor alläm irenä Chind! I main, äbä: Chinderrente… Was chunt als nägschts: Pränatali Früepensionierig? Gebärmueterschaftsurlaub? Also wörkli: Chind. Hend no niä gschaffed und chömed scho Rentä über, das goot aifach nöd. Und genau dött liit aigentlich au d‘Lösig für das Problem.

M: Und wiä gseet diä Lösig us?

R: Jo Chinderarbet

M: Chinderarbet?

R: Jo Chinderarbet. Das wär numä fair! Und konsequent! Dä Chind wird zwor d’Rentä kürzt, aber defür törfeds go schaffä! Guet: S‘Wort «Chinderarbet» isch vilicht es bitzli emotional ufgladä, i waiss, drum: Es mues jo nöd unbedingt «Chinderarbet» haissä, sondern vilicht… «Zustupf für Eltern.» Aber i glaub, da isch nöd meerhaitsfähig. Wel, ganz fair isches jo denn gliich nöd.

M: Jo, Chinderarbet isch wörkli nöd fair gegenüber Chind, do gibi Dir also recht.

R: Nai! Nöd gegenüber dä Chind! Gegenüber dä Elterä! Also dä Elterä, wo kai IV bezüched! Di anderä Chind törfed schaffä und iri Chind nöd, das isch doch unfair! Kinderarbeit für alle! Und jo klar, i waiss. Do hend vili Müe, wel s’Wort «Chind» isch jo au seer emotional ufgladä. Drum werded künftig Chind au nümä Chind haissä, sondern «Zumutung für Eltern». Und Elterä au nümä Elterä, sondern «Menschä mit Bechinderig.»

M: Oisen Ussekorreschpondent, dä Renato Kaiser!