Aare
°

Journal B

Sagt, was Bern bewegt
Aare
°

KOLUMNE /

Renato Kaiser

21.02.2019 | 12:07

Air Zermatt und Hertz stellen den «schnellsten Skilift der Welt» vor: mit SUV und Helikopter direkt ins Skigebet. Renato Kaiser ist begeistert.

Michael: Sit dere Wuche gits im Wallis e noii Attraktion. Und zwar händ d'Air Zermatt und de Auto-Vermieter Hertz zäme es nois Aagebot vorgschtellt mitm Titel: «De schnällscht Ski-Lift vode Wält.» D'Frog a oisen Usse-Korreschpondent, de Renato Kaiser, wie gseht de Skilift genau us?

Renato: Toll. Aifach nur toll. Luäg Michi, i mues aigentli als Journalischt neutral blibä, aber do gits aifach kai zwai Mainigä, los zuä: Du chunsch a irgenderä Mietstation idä Schwiz an SUV über, faarsch mit dem bis uf Raron, schtigsch dött inän Helikopter und dä flügt Di nocher direkt is Skigebiet am Matterhorn. Mitm Helikopter!

M: Schön, dass deer das gfallt Renato. Aber ehrlich, sones Agebot iifüere, womer grad probiered d'Umwält z'schütze, das isch doch schlächt fürs Klima.

R: ... Helikopter!

M: Jo Helikopter und Glände-Wage!

R: Jo guet, also do muemer scho klarschtellä. Di Verantwortlichä säged usdrücklich, sie bütet EXTRA nur än Volvo-SUV aa und nöd ä PS-stärcheri Variante. Für d'Umwelt! Do zaigeds doch iren guetä Willä, bzw. Volvollen! Me sait jo au i Fachkraisä: Volvo - Das Liegevelo unter den Geländewagen.

M: Aso ich find, das tönt eher echli nach: S'Gägeteil vo guet – isch guet gmeint...

R (trotzig): Dini Frisur isch vilicht guät gmaint! Eerlich he. Ä Frisur ha wienen Adlerhorscht mit Schwindsucht und denn wölä öppis über d'Berge verzellä. Überloo das lieber dä Profis, zum Bischpil am Gerold Biner, CEO vo Air Zermatt. Er hät selber gsait: «Es gibt wohl keinen besseren Weg, um die Schönheit unserer Berge den Gästen von Zermatt näherzubringen.»

M: Jo. Dene füf Gäscht wo i dem Helikopter...

R: Helikopter!

M: ...wo i dem Helikopter Platz händ. Und glichzitig schmilzed d'Gletscher, de Schnee verschwindet – aso ich find das chli zynisch.

R: Nanai, Michi, das isch nöd zynisch. Das isch wirtschaftlich! Das isch än wachsendä Markt! Jetz choschted ain Flug no läppischi 1600 Franke. Aber je witer sich jetz d'Gletscher zruggzüched, desto höcher müends mit dä Helikopter ufeflügä, desto no mee chönds verlangä! Mee Geld für mee Helikopter! Und je weniger Schnee, desto me Landeplätz für Helikopter! Und sowiso: S'Matterhon isch jo scho schö. Aber waisch, wivil schöner wär's, wenn's nöd schtändig vo dem huerä Schnee verhüllt wär! Schnee! Die Burka der Berge!

M: Aber ärnschthaft, d'Schwiz ohni Schnee, was hämmer denn no?

R (ungläubig): ... Helikopter! Und diä sind doch wörklich z'schad zum nur ä paar verirrti Chüe rettä, simmer eerlich! Und genau das hend sich diä vo Air Zermatt au denkt und gönd jetz ain Schritt witer. Künftig wird me direkt vo dihai, im SUV, mitm Helikopter, zum Matterhorn gflogä. Waisch so wiä d'Chüä, sozsägä SUVieh-Transport, hähä, nai wörkli, das isch gläbtä Umweltschutz. Än SUV ghört schliesslich nöd ufd Autobaan, sondern id Bergä. Und warum dött ufhörä? Stichwort Langlauf! Ab jetzt, au das, nur no mit Gländewage!

M: Aso was, eifach mitm SUV dure Wald fahre?

R (irre): Jo! Aber er wird zochä! VO HELIKOPTER! WUUUUUUH! (rennt aus dem Bild)

M: Oisen Usse-Korreschpondänt...

R (rennt nochmal durchs Bild): DÄ HELIKOPTER ISCH UF DÄRÄ SITÄ!

M: De Renato Kaiser.


Dieser Beitrag erschien in der SRF Sendung «Late Update». Auf Journal B gibt es die Auftritte von Renato Kaiser regelmässig zum Nachlesen in Schriftform.