Aare
°

Journal B

Sagt, was Bern bewegt
Aare
°

KOLUMNE /

Renato Kaiser

28.12.2018 | 12:25

I ha Eu jo im letschtä Text verzellt, dass dä Toni Bortoluzzi gsait hät, bi Homosexuellä verlaufi än Hirnlappä falsch umä. Das isch natürlich Blödsinn. Schliesslich wüssemer jo ali: Homosexualität isch nöd ä irreparabli Hirnschtörig - sondern ä Modeeerschinig.

 

Das hät zumindescht dä Papscht Franziskus letschti gsait.
Diä mached das nur wel's cool isch.
Lesbä und Schwuli sind aigentlich nur so öppis wiä Fashion Victims.
Genau.

I find jo sowiso, wenn's um Sexualität goot, looni mi jo ee am liebschtä vodä katholischä Chilä uufklärä.
Diä wüssed aifach, vo was das reded!
I main zum Bischpil diä Mönchschloschter:
Du chasch doch nöd Joorhunderte lang Manä zämä i Darkrooms schperrä und denn sägä, Homosexualität segi ä Modeerschinig!
Denn bisch Du dä fucking Modezar!
So vil Manä uf aim Huufä und kainä törf schwul si, wo simmer denn do? Im Profifuessball?
Aber jo homosexuell sii i üserä Gsellschaft macht äbä mega Spass!
Schwul si isch huerä cool
Cool si isch huerä schwul
Wel zum Bischpil sonen Maa immer scho denkt hät: «Hey! So als Hetero komplett idä Gsellschaft integriert si isch huere langwilig! Waisch uf wani jetz richtig Bock hett? So uf bizli Usgrenzig. Jo! Das wär schö. Drum tschüss, Jessica, i bi jetz mitm Adrian zämä, aifach weli gern wör bis a mis Lebensendi mit irgendwelchnä Heteros drüber diskutierä, obi jetz mee dä Maa oder mee d'Frau idä Beziehig segi.»
I glaub äbä homosexuell si isch gar nöd immer so mega cool uf därä Welt.

I waiss zum Bischpil no, wiä im Oktober dä malaysischi Oppositionsfüerer Hamidi Homosexuelli für äs Erdbebä in Indonesiä verantwortlich gmacht hät.
Wel i säbärä Region seged zum Zitpunkt vom Erdbebä 1000 Homosexuelli in «Aktivitätä» involviert gsi.
Da isch kain Witz. Tönt aifach wienen Witz. Kenned Ihr sicher, diä Witz: Wivil soundso bruchts zum ä Glüebirä uswechslä?
I dem Fall wör's haissä:
Wi vil Homosexuelli bruuchts zum äs Erdbebä uslösä?
Kai Aanig, aber, sonen Vibrator hetti gern!
Scho verruckt, was sone Modeerschinig uslösä cha!
Und schtell Dir mol vor, uf dä Welt gits vil mee als nur 1000 Homosexuelli!
Söttsch si also gschider nöd z'fescht provozierä!
Wenn diä sich guät koordiniered, vibriereds Di mit irenä Aktivitätä vilicht über dä Rand vo Dinerä Erdschibä...

Jo! Und vilicht chönt me diä Chraft au für anders Guets nutzä!
Wenn ali Homosexuelle glichzitig zämä aktiv sind, chönds vilicht d'Klima-Erwärmig stoppä!
Und Gott im Himmel hät's Gfüül er hegi äs SMS übercho.

Und jo, für ali, wo wiä dä Papst Franziskus glaubed, Homosexualität segi ä Modeerschinig, ok.
Aber denked aifach dra. Sogar wenn das so wäri, wäred Homosexuelli so chli wiä Leggins. Sie sind immer scho ume gsi. Sie chömed immer wider zrugg. Und sie sind niä richtig weg, egal, ob sie Eu passed, oder nöd.